सुनसरी ।  झापा–११ फुटबल क्लब धरानमा जारी २६औँ अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगिताको सेमिफाइनलमा प्रवेश गरेको छ । मंगलबार धरान रंगशालामा  सम्पन्न खेलमा झापा–११ ले ललितपुरको सातदोबाटो युथ क्लबलाई २–१ गोल अन्तरले पराजित गर्दै अन्तिम चारमा स्थान सुरक्षित गरेको हो ।     

धरान रंगशालामा  मंगलबार  भएको प्रतिस्पर्धात्मक खेलमा झापा–११ ले खेलको सुरुवातदेखि नै आक्रामक प्रदर्शन गरेको थियो। खेलको १७औँ मिनेटमा राजेश दाहालले उत्कृष्ट फिनिसिङमार्फत गोल गर्दै झापा–११ लाई अग्रता दिलाए। पहिलो हाफमा झापा–११ ले केही थप अवसर सिर्जना गरे पनि गोलमा परिणत गर्न सकेन।

दोस्रो हाफमा सातदोबाटो युथ क्लबले खेलमा पुनरागमन गर्ने प्रयास तीव्र बनायो। सोही क्रममा खेलको ५८औँ मिनेटमा सातदोबाटोका विदेशी खेलाडी बबिरोजले आकर्षक गोल गर्दै खेल बराबरीमा ल्याए। बराबरीपछि खेल थप रोमाञ्चक बनेको थियो र दुवै टोलीले निर्णायक गोलका लागि आक्रामक रणनीति अपनाए।

खेलको अन्तिम समयमा झापा–११ का आरोन थापा मगर नायक बने। खेलको ८९औँ मिनेटमा उनले गरेको निर्णायक गोलसँगै झापा–११ ले २–१ को महत्वपूर्ण जित दर्ता गर्‍यो र प्रतियोगिताको अन्तिम चारमा स्थान बनायो।

निर्णायक गोलकर्ता आरोन थापा मगर उत्कृष्ट प्रदर्शनका कारण ‘म्यान अफ द म्याच’ घोषित भए। उनले नगद १० हजार रुपैयाँ पुरस्कार प्राप्त गरे। गोल गरेपछि सातदोबाटोका बबिरोजले दोहोरो पहेंलो कार्ड खाँदै मैदान बाहिरिनुपरेको थियो, जसले सातदोबाटोको खेलमा थप असर पारेको थियो।

यसअघि प्रि–क्वार्टरफाइनल खेलमा झापा–११ ले आरटिसी भुटानलाई १–० गोलले पराजित गर्दै क्वार्टरफाइनल प्रवेश गरेको थियो। उता सातदोबाटो युथ क्लब भने वाइ पाएर सिधै क्वार्टरफाइनल खेलेको थियो। बुढासुब्बा गोल्डकपमा पहिलो पटक सहभागी सातदोबाटो क्वार्टरफाइनलमै प्रतियोगिताबाट बाहिरिन बाध्य भयो।

झापा–११ अब फाइनल प्रवेशका लागि बिहीबार हुने सेमिफाइनल खेलमा चर्च ब्वाइज युनाइटेडसँग भिड्नेछ। त्यस्तै, बुधबार हुने पहिलो सेमिफाइनल खेलमा पोखराको लालीगुराँस एसोसिएसन र प्लानिङ ब्वाइज युनाइटेड आमनेसामने हुनेछन्। फागुन २ गतेसम्म सञ्चालन हुने प्रतियोगिताको विजेताले ट्रफी, मेडलसहित नगद १० लाख रुपैयाँ प्राप्त गर्नेछ भने उपविजेताले ५ लाख रुपैयाँ पाउनेछ। साथै प्रतियोगिताको सर्वोत्कृष्ट खेलाडीलाई डियो स्कुटर प्रदान गरिने आयोजकले जनाएको छ।